2Sa 12 | PMA | STEP | En avong tai, Iahova sila provet Netan va ven asuv houlu Deved. Ka navong va veni, kei viteni mini vit, “?Asuv houlu Deved, kokilea kovalei revi en usite tai onak? Meatin elu luro en taon tai. Tai, tounah onen houlu, ka tamun, tounah onen rovitei houlu.

2 Samuel 12

Iahova Sel Kat Asuv Houlu Deved

2 Samuel 12:1-23

1 En avong tai, Iahova sila provet Netan va ven asuv houlu Deved. Ka navong va veni, kei viteni mini vit, “?Asuv houlu Deved, kokilea kovalei revi en usite tai onak? Meatin elu luro en taon tai. Tai, tounah onen houlu, ka tamun, tounah onen rovitei houlu. 2 Koa tounah onen houlu, buluk ka sipsip osen keil avi houlu ramat. 3 Ka koa tounah onen onen rovitei houlu, kei mul losil kat titi sipsip osen tas koa kei vuli. Kei lei kat revi titi sipsip osen ka mul moul en teim sen ral min titiali keil onen. Mul san anien an koa mini, maen vamun oai en kap onen, ka maeni vamatil en avet omon. Anatin, kei lei kat revi titi sipsip enek suval koa vi natnahin kati. 4 Avong tai, meatin tai ka soutin ka mual mai en teim onen kei koa tounah onen houlu. Ka meatin koa tounah onen houlu enrovattei vouas etai tirendan osen keke vasak mesen anien vahi an. Sakini, va suk kur titi sipsip osen koa tounah onen onen rovitei houlu. Evus, muasi ka lengasi mese keke meatin koa emai vani.”

5 Navong Netan viteni mukok, Deved tin tisa houlu ka vit, “!Inau navat kati keih imok en meten Iahova koa moul keke mal keke meatin enek hemat ven asa koa mumoni! 6 Veni tounah koa mumoni tisa revi mok ka enmahisien onen tovuol, kei hesan kes titi sipsip osen hehat (4).”

7 Sakini Netan viteni min Deved vit, “!Keik varei kovi meatin enek! Ka koanek vi asa koa Iahova, Ahi onen me-Isrel keil, envati vahiteni minuk: 'Inau namumonuk komai kovi asuv houlu onen me-Isrel keil, ka naring koek ran asa koa Sol vit voumoni minuk. 8 Ka navong nakulat Sol, tounah keil koa mul en hen, nasa lati minuk. Ahin onen emun keil, nasani minuk. Me-Isrel keil ral min me-Sudah keil, inau naling keil vasi en hem. Ka munak tounah vasi enek rovinvintei veah, inau nakilea masani vahi houlu tamun emau. 9 ?Sakini, vensa korlong kattei rek? ?Vensa komumon tounah koa tisa en metok? Keik varei komuas Uraea mat en naef tavaeen onen me-Amon keil. !Evus, kokur ahin onen mai vi onom! 10 Ven komumon koanek, vatiamal tei keil onom, lises imatmat en naef tavaeen onen meatin sav keil. Koanek hekistal en vatiamal onom kati veni kosesein rek navong kokur ahin onen Uraea, koan Hit, vi onom.'

11 “Iahova viteni mun minuk vit, 'Naviteni anatin keke nisakin koakeil en teim onom kati imea um hetisa heha katuk. Kilesi en metom navong inau nikulat ahin keil onom ranuk ka nisani iha min tai koa hemea en vatiamal onom. Kei hematil hetal min keil en mesaiuai enges. 12 Anatin, asa komumoni, komum suaini. Ka asa koa inau numoni, numoni hekistal en mesaiuai en meten me-Isrel keil vasi.'”

13 Navong Deved longe, viteni min Netan vit, “!Aue li! !Inau namum tisa houlu li en meten Iahova!”

Ka provet Netan vit kesi mini vit, “Iahova sahulin tisaen ran moulien onom ka keik, kirmattei. 14 Ka veni koviles eisilum rani ka komumon sakien tatisa enek, tivava onom koa avasi, kei hemat.” 15 Evus, provet Netan va ris teim sen.

Ka navong provet Netan va, Iahova sakin tivava onen Deved koa ahin onen Uraea kuri mesai houlu. 16 Sakini, Deved va mul vis min Ahi keke titiali onen vamai ris vatahos. Kei val ran anien, ka vongien vasi, kei matil en atan va rokol out mulan. 17 Hetetamen keil onen koa amul vesesal veni, uva asak visi avatali lati. Ka kei enrovattei ka seseini keke vaha vanian vatal min keil.

18 Wik tai muli, ka titiali enek emat esuk. Ka navong mat, hetetamen keil onen Deved ametau avaha avahiteni mini. Keil amundemi avit, “Navong titiali enek mul veah moul, Deved enrovattei valong selusien orer. ?Sakini, rehehit mesen matien onen titiali onen hemukave? Vahesa noumon etai tounah natisa suk min kei sasen enges.”

19 Navong Deved les keil amul aselus lelau en keil, kilea varei keke titan mat. Sakini vis keil vit, “?Mukave? ?Titiali mat?”

Ka keil avit kesi mini avit, “Anatin eli, kei li mat.”

20 Navong Deved longe, mea ran atan, va mukul, sahula aven en oel, ka kekes en eisin omon. Evus, va en Eim Tavolin onen Iahova ka vita netan mini. Ka navong mai ris teim sen, vis anien. Sakini asan anien mini, ka kanian esuk.

21 Navong hetetamen keil onen ales sakien keil onen, keil umai veni avisi avit, “?Komumon sakien keil enek vensa? Navong titiali onom mul veah moul, korangisi ka kuval ran anien. Ka navong kei mat, keik komea ka kokanian esuk.”

22 Asuv houlu Deved vit kesi min keil vit, “Anatin keke nouval ran anien ka namurang navong titiali enek mul veah moul. Namundemi navit vahesa Iahova enhemahis inau, ka hermaentei titiali enek hemat. 23 Ka kosa, kei mat tuai. ?Vensa mahal ran anien? ?!Nakilea masakin titiali enek vamoul eris!? !Vuo, nasakras! Avong etai, inau niha en out koa kei ro ien, ka kei sakras vamai ris venau.”

Solomon Avasi

2 Samuel 12:24-25

24 Sakini, asuv houlu Deved va selus tahos min ahin onen, Batsiba, vahati lat rendemien onen vamai ris vatahos. Luro vituai ka kei meas. Avati keil muli va, kur tivava tai koa vi meahos, ka Deved ling isen vi “Solomon'. Iahova envat titiali enek houlu mok, 25 sakini viteni min provet Netan keke hesan eis sav tei mini koa vi 'Sedidaia' koa aneite teni vi 'kei koa Iahova envati'.